Azərbaycan və Türkiyə Mədəniyyət nazirlikləri və Bakı Yunus Əmrə İnstitutunun təşkilatçılığı ilə "Lavaş günü" layihəsi həyata keçirilir.

Axar.az xəbər verir ki, bu münasibətlə sabah saat 14:30-da "Qoç ət" restoranında ("Nizami" metrosunun yaxınlığı) "Lavaş türkün ortaq mirasıdır" mövzusunda mətbuat konfransı təşkil olunacaq.

Layihənin məqsədi ictimaiyyətin diqqətini milli mətbəximizin qədim nümunəsi olan lavaşın Ermənistan tərəfindən mənimsənilməsi faktına yönəltməkdir. Bir ay davam edəcək layihə çərçivəsində Bakıda şəhərdaxili xidmət göstərən avtobuslar lavaşın təbliğinə dair məlumatla təchiz olunacaq, "Nizami" metrosunun çıxışında insanlara lavaşa həsr edilmiş broşürlər paylanılacaq.

Xatırladaq ki, 26 noyabr 2014-cü il tarixdə Ermənistan tərəfindən milli mətbəximizin qədim nümunələrindən olan lavaş YUNESKO-nun Qeyri-maddi mədəni irs üzrə Reprezentativ siyahısına "erməni çörəyi lavaşın hazırlanması ənənələri" kimi təqdim edilsə də, Azərbaycan tərəfinin etirazları və bununla bağlı həyata keçirilmiş fəaliyyətlər nəticəsində ermənilərin təxribat cəhdlərinin qarşısı alınıb. Belə ki, YUNESKO Konvensiyasının tələblərinə uyğun olaraq faylın adı dəyişdirilib və bununla da lavaş mətbəx mədəniyyətinin erməni millətinə aid olmadığı, sadəcə, bu mətbəx nümunəsinin Ermənistan ərazisində də mövcud olduğu qəbul edilib.