Bakının Yasamal rayonunda sərxoş olduğu deyilən sürücü qəza törədib.

Axar.az xəbər verir ki, bu barədə sosial şəbəkələrə görüntülər yayılıb.

Bildirilib ki, hadisə Hüseyn Cavid prospektində qeydə alınıb.

Belə ki, hərəkətdə olan “Honda” markalı avtomobil yüksək sürətlə təhlükəli manevrlər edərək, hərəkətdə olan avtomobilə, daha sonra isə yol kənarında dayanmış 3 avtomobilə çırpılıb.

Qəza nəticəsində bir neçə nəfərin xəsarət aldığı və avtomobillərə ciddi ziyan dəydiyi bildirilir.

İddia olunur ki, qəzanı törədən sərxoş sürücü avtomobildən düşərək hadisə yerindən qaçıb.

Sosial şəbəkələrdə hadisəni törədən şəxsin Müsavat partiyasının başqanı Arif Hacılının oğlu Orxan Hacılı olduğu bildirilir. İddiaya görə, Orxan Hacılı qəza törətdikdən sonra qaçıb və əvəzinə başqa şəxsi hadisə yerinə göndərərək, sürücü kimi göstərməyə cəhd edib.