Xəbər verdiyimiz kimi, Prezident İlham Əliyevin sərəncamı ilə Dini Qurumlarla İş üzrə Dövlət Komitəsi sədrinin birinci müavini Səyyad Salahlı (Səyyad Aran) vəzifəsindən azad edilib.

Axar.az xəbər verir ki, yazıçı-publisist Səyyad Aran 15 yanvar 1952-ci ildə İmişlidə anadan olub. Ailədə 10 uşaq olublar və o, ailənin ilkidir.

Azərbaycan Dövlət Pedaqoji İnstitutunun Filologiya fakültəsini 1972-ci ildə bitirib. İkinci ali təhsilini Bakı Dövlət Universitetində alıb və 2001-ci ildə BDU-nun Hüquq fakültəsindən məzun olub.

2005-ci ildə filologiya elmləri namizədi alimlik dərəcəsi alıb.

1974-cü ildən 1989-cu il dekabrın sonuna qədər 1 saylı İmişli şəhər orta məktəbində əvvəlcə dil-ədəbiyyat müəllimi, ibtidai hissə üzrə müavin, sonra ilk partiya təşkilat katibi, sinifdənxaric və məktəbdənkənar tərbiyə işləri üzrə direktor müavini vəzifələrində çalışıb.

1990-cı ildə İmişli Rayon Xalq Təhsil şöbəsinin müdiri olub.

2 yanvar 1991-ci ildə “Elm” qəzetində Azərbaycan şöbəsinin müdiri işləyib. 1992–1995-ci illərdə isə “Səs” qəzetinin baş redaktorunun birinci müavini olub.

2001-2006-cı illlərdə Azərbaycan Beynəlxalq Universitetinin Jurnalistika fakültəsinin dekanı işləyib.

2011–2012-ci illərdə Azərbaycan Respublikası Milli Məclisinin Aparat rəhbərinin xidmətinin Ərazi vahidlərinin və bələdiyyələrin Dövlət reyestri sektorunun aparıcı məsləhətçisi kimi çalışıb.

1995 və 2000-ci il seçkilərində deputat seçilib. 2006-2010-cu illərdə İstanbulda baş konsul olub.

2012-ci ildə Dini Qurumlarla İş üzrə Dövlət Komitəsini sədrinin birinci müavini idi.

YAP-ın qurucularından olan Səyyad Aran ədəbi fəaliyyəti ilə diqqət mərkəzində olub, çoxsaylı əsərlərin müallifidir.

Səyyad Aranın hazırda 72 yaşı var və o, yaşı ilə bağlı pensiyaya göndərilib.