Son günlərin trendinə çevrilən iş adamı (İsfəndiyar Axundov) da problemli bina satışında ilk onluq, hətta ilk beşlikdədir. O cür şəxslərin bazarda açıq şəkildə hamıya meydan oxuya biləcək bəyanatlar verməsi təəssüf doğuran haldır.

Axar.az xəbər verir ki, sözləri əmlak eksperti Ramil Osmanlı Axar TV-yə geniş müsahibəsi zamanı deyib.

“Tutaq ki, bir tikinti şirkəti mənzil tikintisini 5-6-cı mərtəbəyə qədər normal davam edib, sonra problem yaşayıb və tikinti mərhələsi 3-5 il uzanıb. Təbii ki, o binada satış imkanları məhdudlaşır. Məsələn, son günlərin çox məşhur bir iş adamı müzakirə olunur. O adamın tikdiyi binalarla yanındakı binalar arasında 20-30% qiymət fərqi var. Bu, bilavasitə bir fərdin adına bağlı olan məsələdir. Buna “brendləşdirilmə” də deyə bilərik. Son illər populyarlıq qazanan və intensiv şəkildə tikinti işləri ilə məşğul olan bir çox tikinti şirkəti var ki, keyfiyyətli binalar tikməklə yanaşı, heç bir problemlə də qarşılaşmırlar. Ancaq elə tikinti şirkətləri də var ki, nəinki tikinti zamanı, hətta sonrakı mərhələlərdə də problem yaradırlar. Ödəniş və müqavilə şərtləri dəyişir. Müqavilələrin dəyişməsinə görə fantastik məbləğdə pullar istənilir. Gələcəkdə isə qeydiyyat və digər məsələlərdə problem yaranır. Elə də olur ki, başqa və köhnə binada olan lifti gətirib yeni binada quraşdırırlar”, - deyə ekspert bildirib.