Gəncə şəhəri 34 saylı orta məktəbdə bu il Son zəng tədbiri olmayacaq.

Bu barədə Axar.az-a məktəbdən məlumat verilib.

Bildirilib ki, qərar mayın 12-si axşam saatlarında döyülərək qətlə yetirilən məktəbli Elgün İbrahimovun xatirəsinə hörmət əlaməti olaraq qəbul edilib.

“Yalnız rəsmi hissə keçiriləcək. Bədii hissə baş tutmayacaq. Tədbirdə Elgünün fotosundan ibarət kollaj nümayiş olunacaq. Ailə üzvlərinin iştirak edib-etməyəcəyi barədə hələlik məlumat yoxdur. Onlar hazırda elə vəziyyətdədirlər ki, iştirak edə biləcəklərmi, bilmirik. Amma məktəb olaraq Elgünün xatirəsini anacağıq”, - məktəbdən bildirilib.

Qeyd edək ki, mayın 12-si axşam saatlarında Gəncədə 11-ci sinif şagirdi Elgün İbrahimov küçədə amansızcasına döyülüb və ertəsi gün aldığı xəsarətlərdən xəstəxanada dünyasını dəyişib. Hüquq-mühafizə orqanları hadisəni törədən şəxs və şəxslərin axtarışını davam etdirir.