Məktəblərdə dərs ili rəsmi olaraq başa çatmamış, dərs vəsaitlərinin – xüsusilə də IX və XI sinif şagirdlərinin istifadə etdiyi dərsliklərin – qəbul imtahanlarına az qalmış yığılması halları son illərdə tez-tez müşahidə olunan ciddi struktur boşluqlarından biridir. Bu vəziyyət həm pedaqoji, həm də idarəetmə baxımından sistemsizlik və planlaşdırma zəifliyini ortaya qoyur. Dərs vəsaitlərinin erkən yığılması abituriyentlərin yeganə rəsmi mənbəyə çıxışını kəsir, tədris imkanlarını məhdudlaşdırır.

Bu sözləri Axar.az-a açıqlamasında təhsil eksperti Kamran Əsədov bildirib.

Ekspert qeyd edib ki, dərsliklərin vaxtından əvvəl yığılması hüquqi baxımdan da suallar doğurur:

“Azərbaycan Respublikasının “Təhsil haqqında” Qanununun 13.1-ci maddəsinə əsasən, tədris planları və tədris ili müddətləri müvafiq icra hakimiyyəti orqanı tərəfindən müəyyən edilir və bu müddət ərzində dərs prosesi tam şəkildə təmin edilməlidir. Şagirdlərin dərs ili başa çatmamış tədris vəsaitlərindən məhrum edilməsi konstitusion təhsil hüququna ziddir. Əgər dərs vəsaitləri toplanırsa, bu o deməkdir ki, dərs prosesi faktiki olaraq başa çatıb. Bu zaman məktəbə gələn şagirdlər dərsdə yalnız formal iştirak edir, yeni mövzu keçmək və ya əvvəlkiləri təkrar etmək üçün resursları olmur. Bu isə məktəbin real öyrənmə platforması funksiyasını itirməsi deməkdir. Elm və Təhsil Nazirliyi dərsliklərin dövriyyəsi ilə bağlı vahid və məcburi icra olunmalı təlimat hazırlamalı, bu sənəddə dərsliklərin yalnız dərs ili bitdikdən sonra və planlı şəkildə yığılması göstərilməlidir”.