Eksperiment zamanı Kaliforniya alimləri lazerin köməyi ilə kosmik fəzaya yaxınlaşdırılmış şəraitdə formaca asteroidə oxşayan obyektin əvvəlcə sürətini azaltmağa və saxlamağa, sonra isə onun istiqamətini dəyişməyə müvəffəq olub.

Axar.az xəbər verir ki, bu istiqamətdə aparılan tədqiqatlar gələcəkdə asteroidlərin və Yer kürəsi üçün potensial təhlükə törədə biləcək hava cismlərinin istiqamətini dəyişdirməyə köməklik göstərə biləcək. Sözügedən tədqiqatlara Kaliforniya Universitetinin fiziki Filip Lyubin və Kaliforniya Pedoqoji Universitetinin professoru Hari Hyuz rəhbərlik edib.

Eksperiment şəraitinin yaradılması üçün tədqiqatçılar xüsusi xassələrinə görə asteroidə oxşayan bazaltdan istifadə ediblər. Bazalt qaza çevrilənə qədər onun üzərinə lazer şüası istiqamətləndirilib. Kosmik fəzada asteroidin hərəkətini imitasiya etməsi üçün bazalt maqnitlərin arasına yerləşdirilib. İstiqamətləndirilmiş lazer şüası ilə bu hərəkətin sürətini nəzarətə götürmək mümkün olub.

Xatırladaq ki, may ayında NASA Yer kürəsi üçün təhlükəli olan asteroidləri "tutaraq" qarşısının alınması metodlarına yaxın 10 il ərzində nail olunacağına dair bəyanat verib. NASA-nın bu planına görə, "tutulan" asteroidlər Yerin orbitinə yaxın istiqamətləndiriləcək və kosmonavtlar onların öyrənilməsi üçün tədqiqat aparacaqlar.