Deputat komitələrdə işləməlidir, seçicilərlə görüşməlidir, onların təklifləri əsasında məsələlər qaldırmalıdır, qanunvericilik təşəbbüsü ilə məşğul olmalıdır. Hökmən deyil ki, Milli Məclisin deputatı ancaq iclasda otursun.

Axar.az xəbər verir ki, bu sözləri millət vəkili Siyavuş Novruzov Milli Məclisin iclaslarının ayda iki dəfədən az olmayaraq keçirilməsi barədə 2002-ci ildə qəbul edilən qərarı şərh edərkən Musavat.com-a deyib. Millət vəkili həmçinin qəbiristanlıqla bağlı qanun layihəsinə də toxunub:

"Qəbiristanlıqlar haqqında qanun layihəsini təqdim edəcəyəm. Mən bunu 20 instansiya ilə razılaşdırmalıyam. Yeri biri verir, ona nəzarəti digəri edir, digəri başqa işi yerinə yetirir. Qanunu qəbul elə, qoy masanın üstünə, bununla iş bitmir ki! Gərək həmin 20 qurumun hamısı ilə bir-bir razılaşdırılsın. Bu qurumların hamısı qanun layihəsinə viza verməlidir. Hər bir qanun layihəsi ilə bağlı 20 instansiyadan viza alınmalıdır".