Berlində əldə edilmiş razılaşmaların əksinə olaraq, Donetskdə terrorçular Beynəlxalq Qırmızı Xaç Cəmiyyətinin nümayəndələrinin Ukrayna girovlarına baş çəkməsinə razılıq verməyiblər.

Axar.az xəbər verir ki, bu sözləri Ukrayna Prezidenti Pyotr Poroşenko qeyd edib.

"Növbəti dəfə onlar girovlarımıza baş çəkmək üçün BQXC-nə icazə vermədilər. Bu qəti surətdə qəbuledilməzdir, razılaşmalar yerinə yetirilmir", - Poroşenko vurğulayıb.

Prezident həmçinin qeyd edib ki, Berlində atəşkəs rejiminə əməl etmək barədə razılıq əldə edilsə də, bütün cəbhəboyu atışmalar gedir.

Qeyd edək ki, bir müddət əvvəl Berlində Normand dördlüyünün görüşü keçirilib, tərəflər münaqişə bölgəsində atəşkəsə əməl edilməsi barədə razılıq əldə etmişdilər.