Sentyabrın 26-da Berlində Rusiya-Ukrayna-Avropa İttifaqının qazla bağlı növbəti üçtərəfli görüşü keçiriləcək.

Axar.az xəbər verir ki, bu açıqlama ilə Rusiya Energetika naziri Aleksandr Novak çıxış edib.

O, Rusiyanın qaz məsələsində Ukraynaya güzəştə getməyəcəyini bildirib:

"Növbəti görüşümüz sentyabrın 26-da baş tutacaq. Bizim mövqeyimiz dəyişilməzdir. Ukraynanın 2013-cü ilin 4-5 ayı ərzində Rusiyaya iki milyard dollar borcu var".

Qeyd edək ki, Moskva və Kiyev indiyə kimi rus qazının Ukrayna üçün qiymətində razılığa gələ bilmirlər. Rusiya min kubmetr üçün müvəqqəti qiymətin 385 dollar olmasını təklif edib. Lakin Ukraynanın Baş naziri Arseni Yaçenyuk yay üçün min kubmetrə 300 dollar, qış ayları üçün isə 380 dollarla razılaşacağını bildirmişdi.