İŞİD-in Mosulda işğal etdiyi ərazilərə ərəb ailələri yerləşdirərək ərəbləşdirmə siyasəti apardığı iddia edilir.

Axar.az xəbər verir ki, bu barədə danışan Kürdüstan Demokrat Partiyası nümayəndəsi Said Məmuzini İŞİD-in işğalı altındakı Beyci və Ramadi rayonlarından gətirdiyi 218 ərəb ailəsini Mosulda yerləşdirdiyini deyib.

Məmuzini təşkilatın kürd kəndlərinə yerləşdirdiyi ərəbləri silahlandıraraq peşmərgə qüvvələrinə qarşı istifadə etdiyini qeyd edib. İŞİD-in müharibəyə getməyən gəncləri 1200 dollar məbləğində cərimələdiyi iddia edilir.

Qeyd edək ki, İraqın sabiq lideri Səddam Hüseyn dövründə də kürd və türk bölgələrində ərəbləşdirmə siyasəti aparılıb. Onun dövründə türkmanlar mühacirətə vadar edilirdi. 1960-cı ildə Kərkükün 95 faizi türk idisə, 20 il sonra bu rəqəm 75 faizə qədər düşmüşdü.