Türkiyə Prezidenti Rəcəb Tayyib Ərdoğan İstanbulda "Qadın və Ədalət" mövzusunda təşkil edilən konfransda dediyi sözlərə aydınlıq gətirib.

Axar.az xəbər verir ki, Ərdoğan sözlərinin yozulduğunu dilə gətirib:

"Dediyim bu: qadın və kişini bərabər mövqeyə gətirə bilməzsiniz. Qadınların ehtiyacı olan bərabərlikdən çox, bərabər ola bilməkdir. Dediyim budur. Qadın və kişi arasında bərabərlik deyil, yoldaşlıq olmalıdır. Yəni ədalət olmalıdır".

Ərdoğan dünya mediasının onun sözlərini başqa məqsədlər üçün istifadə etdiyini deyərək sözlərinin təhrif olunduğunu bildirib:

"Dünən bəzi ölkələrin qəzetləri, dünya miqyasında tanınmış nəşrlər son dərəcə məlum olan fikrimin bəzi hissəsini qabardaraq insanlarda səhv təəssurat yaradıb. Çox fərqli, çox səhv şəkildə əks etdirdilər. Kimsə belə əxlaq zəifliyi ilə uğur qazana bilməz. Bunlarda yalan var, bunlarda böhtan var, bunlarda təhqir var, bunlarda olmayan tək şey dürüstlükdür. Şəxsən 40 ildən çox siyasi mübarizəmdə qadın haqlarını necə müdafiə etdiyim, necə təşviq etdiyim göz önündədir. Heç kim bu mövzuda mənə və yoldaşlarıma qara yaxa bilməz".