"Türkiyə 2009-cu ildən etibarən ilk dəfədir ki, baş nazir səviyyəsində Davosda keçirilən illik ənənəvi Dünya İqtisadiyyat Forumunun toplantısına qatılacaq".

Bu sözləri Axar.az-a açıqlamasında analitik Vüqar Zifəroğlu deyib.

Onun sözlərinə görə, əslində Davudoğlunun foruma qatılmağını rəsmi Ankaranın 2015-ci ildə Avropa Birliyi istiqamətində atmağı planlaşdırdığı addımların tərkib hissəsi kimi qiymətləndirmək olar:

"Davudoğlu İsveçrədəki forumla yanaşı, Avropa Birliyinin üzvləri olan Almaniya, İngiltərə və Belçikaya da səfər edəcək. Səfər çərçivəsində Almaniya kansleri Angela Merkel, İngiltərənin Baş naziri Devid Kemeronla görüşlər və eləcə də Davosda Davudoğlunun 24 yanvar tarixində tək natiq olaraq iştirakçılar qarşısında çıxışı planlaşdırılıb. Ehtimal etmək olar ki, həm görüşlərdə, həm də çıxışda əsas vurğu neftin qiymətinin aşağı düşməsi ilə son iqtisadi durum, Yaxın Şərqdəki vəziyyət və əsasən də Türkiyənin Avropa Birliyi yolu olacaq. Həmçinin, Davudoğlunun qondarma erməni soyqırımının 100 illiyi ilə əlaqədar yerli diaspor təşkilatları ilə də görüşəcəyini istisna etmək olmaz. İstənilən halda Davudoğlunun Avropa turnesi konkret hədəflərə və məqsədə yönəlib".

Xatırladaq ki, Türkiyə 2009-cu ildən etibarən ilk dəfədir ki, baş nazir səviyyəsində Davosda keçirilən illik ənənəvi Dünya İqtisadiyyat Forumunun toplantısına qatılacaq. 2009-cu ildə Türkiyənin o zamankı baş naziri, indiki Prezident Rəcəb Tayyib Ərdoğanla İsrailin dövlət başçısı Şimon Peres arasında baş verən məşhur "Van minut" qalmaqalından sonra Ankara Davosa baş nazir səviyyəsində qatılmırdı və 2009-2014-cü illər arasında Dünya İqtisadiyyat Forumunda təmsilçi olaraq Türkiyəni baş nazirin müavini Əli Babacan təmsil edirdi.