"Ermənistan hətta daxili narazılıqlara rəğmən Rusiyadan imtina etməyəcək".

Bu sözləri Axar.az-a açıqlamasında "Oğuz" müstəqil araşdırmaçılar qrupunun rəhbəri, analitik Vüqar Zifəroğlu Gümrü hadisələri ilə bağlı Ermənistanda baş verən son iğtişaşlarla bağlı deyib.

O, Ermənistanda Rusiyaya qarşı başlamış çıxışların xarakterindən söhbət açaraq, bu münasibətlərdəki perspektivləri qeyd edib:

"Ermənistanda ayrı-ayrı qüvvələr Qərbə meyl edə bilərlər. Amma bu, Ermənistanın siyasi kursunda hər hansı bir prinsipial dəyişikliyin olması anlamına gəlməz. SSRİ dağıldıqdan sonra Ermənistanın müstəqilliyi hər zaman formal xarakter daşıyıb. Ermənilər həmişə Rusiyanın siyasi iddiaları və hədəflərinin gerçəkləşməsi istiqamətində bir alət funksiyasını yerinə yetiriblər. Bu səbəbdən də rusiyalı jurnalist və politoloqların son açıqlamaları da məhz bu reallığı bir daha ermənilərin yadına salmaqdan və onlara yerlerini göstərməkdən başqa bir şey deyil. Ermənistan hətta daxili narazılıqlara rəğmən, Rusiyadan imtina etməyəcək. Çünki vassal kimi olsa belə, mövcudluğunu Rusiyaya borcludur. Bu səbəbdən belə hesab edirəm ki, həmin aksiyalar bir müddət sonra səngiyəcək. Ermənilərdə milli mənlik şüuru o qədər inkişaf etməyib ki, Rusiyaya – yəni öz ağalarına qarşı hər hansı prinsipial mövqe ortaya qoya bilsinlər".