"İrəvan öz əhalisinə göstərmək istəyir ki, müharibə şəraitindədir və rus qoşunlarının Ermənistan ərazisində qalması əslində onlar üçün müəyyən avantajdır".

Bu sözləri Axar.az-a analitik Vüqar Zifəroğlu Ermənistanın son zamanlar atəşkəsi daha sıx pozmasını şərh edərkən bildirib:

"Bu, daha çox Ermənistanın öz daxilində baş qaldıran anti-Rusiya meyllərindən, eləcə də Rusiya iqtisadiyyatının çökməsi fonunda Ermənistanı qabaqda gözləyən ciddi iqtisadi tənəzzüldən bir növ diqqəti yayındırmaq məqsədi daşıyır. Rusiya ilə bağlı baş verən bütün proseslərin dolayısı ilə Ermənistana da bir vassal olaraq təsir etməsini nəzərə alsaq, o zaman vəziyyəti onsuz da ürəkaçan olmayan rəsmi İrəvanı qabaqda son dərəcə ağır dövr gözlədiyini söyləmək mümkündür".

Politoloq Ermənistanın Avropa Oyunları ərəfəsində narahatlıq yaratmaq istəyi ehtimalına da münasibət bildirib:

"Təbii ki, bunu qarşıdan gələn Avropa Oyunları ilə də əlaqələndirmək olar. Amma bir məqam da var ki, Ermənistan özü də bu oyunlarda iştirak edəcək. Fikrimcə, burada əsas məqam məhz Rusiya faktorudur. İrəvan öz əhalisinə göstərmək istəyir ki, müharibə şəraitindədir və rus qoşunlarının Ermənistan ərazisində qalması, əslində, onlar üçün müəyyən avantajdır. Eyni zamanda qarşıdan gələn iqtisadi sanksiyalar Ermənistana ciddi təsir göstərəcək. Bildiyimiz kimi, Ermənistan iqtisadiyyatı bir müstəqil dövlətin iqtisadiyyatından daha çox Rusiyanın tərkibinə daxil olan bir federasiya subyektinin iqtisadiyyatı şəklindədir. Bu anlamda Azərbaycanla təmas xəttində təxribata getməklə baş qaldıracaq anti-Rusiya əhval-ruhiyyəsini yatızdırmaq və baş qarışdırmaq istəyirlər".