"Son günlərdə Rusiya-Ermənistan münasibətlərində müəyyən mənada soyuqluq müşahidə olunur. Çünki Rusiya bu gün Ermənistanın gözlədiyi dəstəyi verə bilmir. Bu isə Ermənistanda qıcıq yaradır".

Bunu Axar.az-a açıqlamasında analitik Vüqar Zifəroğlu bildirib. O, Kollektiv Təhlükəsizlik Müqaviləsi Təşkilatının (KTMT) baş katibi Nikolay Bordyujanın Dağlıq Qarabağda gərginlik baş verəcəyi təqdirdə təşkilatın heç bir hərbi müdaxilə etməyəcəyi barədə fikirlərinə aydınlıq gətirib:

"KTMT bu bəyanatla Ermənistana öz yerini bildirmiş oldu. Böyük kiçiyin qulağını dartdığı kimi, Rusiya da zamanla Ermənistanın qulağını dartır. Bu gün cəbhədə atəşkəsin pozulması və digər hallar birbaşa Ermənistanın günahı ucbatından baş verir. Hazırda Dağlıq Qarabağ münaqişəsinin alovlanması Rusiyaya sərf etmir. Rusiya həmişə bu münaqişənin dondurulmasının tərəfdarıdır. Rusiya Ermənistana zamanla bu xəbərdarlığı edir ki, biz olmasaq, Azərbaycanın qarşısında duruş gətirmək şansınız yoxdur. Bunu Ermənistan da çox yaxşı bilir. Lakin Rusiya Ermənistandan heç vaxt üz döndərməyəcək. Rusiya ilə Ermənistan əlaqələri çoxəsrlik ağa-vassal münasibətlərinə söykənir. Rusiya öz vassalını heç vaxt qapısından qovmaz. Ermənistan Rusiyaya Cənubi Qafqazda forpost rolunu oynamaq üçün lazımdır".

Qeyd edək ki, Kollektiv Təhlükəsizlik Müqaviləsi Təşkilatının (KTMT) baş katibi Nikolay Bordyuja erməni jurnalistin sualını cavablandırarkən Dağlıq Qarabağda gərginlik baş verəcəyi təqdirdə təşkilatın hərbi müdaxilə etməyəcəyini bildirib.