"Türk axını" projesi və digər transmilli layihələrin, o cümlədən Suriya məsələsinin Ərdoğan-Putin görüşünün müzakirə predmeti olacağını ehtimal etmək olar".

Bu barədə Axar.az-a açıqlamasında politoloq Vüqar Zifəroğlu Rusiya Prezidenti Vladimir Putinin türkiyəli həmkarı Ərdoğanla Bakı görüşünü şərh edərkən deyib. Mütəxəssisin sözlərinə görə, liderlər arasında bir sıra vacib məqamların müzakirəsi gözlənilir:

"Həmin görüş hər iki dövlət başçısının Bakıda keçiriləcək Avropa Oyunlarının açılış törəninə qatılmaları çərçivəsində baş tutacaq. Lakin bildiyiniz kimi, idman bəzən mühüm diplomatik danışıqların aparılması üçün də bir bəhanə rolunu oynayır. Xatırlayırsınızsa, Soçi Qiş Olimpiya oyunları zamanı Ərdoğanla Putinin görüşü bağlı qapılar arxasında saatlarla sürdü və həmin görüşdə bir sıra önəmli məsələlər masaya yatırılaraq müzakirə edildi. Bu dəfə də belə bir məsələlərin müzakirə ediləcəyini istisna etmək olmaz. Ən azından "Türk axını" projesi və digər transmilli layihələrin, o cümlədən Suriya məsələsinin müzakirə predmeti olacağını ehtimal etmək olar".

Xatırladaq ki, Rusiya prezidentinin köməkçisi Yuri Uşakov Putinin Ərdoğanla Bakıda bir araya gələcəyini açıqlayıb. Kreml rəsmisinin sözlərinə görə, Putin 12-13 iyun tarixlərində ölkəmizə səfər edəcək. I Avropa Oyunlarının açılış mərasiminə qatılacaq Putin səfər çərçivəsində Prezident İlham Əliyev və Rəcəb Tayyib Ərdoğanla görüşəcək.