"Rəngli inqilablar Qərb ölkələrinin ssenarisi əsasında hazırlanır".

Bu barədə Axar.az-a açıqlamasında analitik Vüqar Zifəroğlu danışıb. O bildirib ki, Ermənistandakı proseslər elektrik enerjisinin qalxması ilə başlasa da, əslində Rusiyaya olan münasibət dəyişməkdədir:

"Yaxın Şərqdə Ərəb baharı, postsovet məkanında - Gürcüstanda, Qırğızıstanda, Ukraynada rəngli narıncı inqilablar hakimiyyət dəyişikliyi ilə nəticələndi. Ermənistanda hər şey elektrik enerjisinin qalxması ilə başlasa da, əslində, daxildə Rusiyaya qarşı münasibət dəyişməkdədir. İqtidarın yarıtmaz siyasəti və tamamilə Rusiyadan asılılıq gec-tez bunu ortaya qoyacaqdı. Təbii ki, Qərbin də burda əlinin olmasını ehtimal etmək olar. Ermənistandakı mitinqlərlə paralel olaraq, miqyas geniş olmasa da, Qırğızıstanda da müəyyən aksiyaların başlaması diqqət çəkməyə bilməz. Hər iki ölkə Rusiyanın Avrasiya Birliyində və Gömrük İttifaqında aktiv mövqe nümayiş etdirir. Ermənistanın Rusiyadan enerji asılılığı isə vəziyyəti daha da gərginləşdirir. İstənilən halda Sərkisyan iqtidarı üçün müəyyən problemlər qaçılmaz olacaq. İstər silah, istərsə də inqilab yolu ilə olsun - əgər Rusiya istəməsə, Ermənistanda heç bir siyasi dəyişiklik olmayacaq. Qərb isə aksiyalarla indiki hökumətə sadəcə bir xəbərdarlıq etmiş oldu. Bir sözlə, Ermənistanla bağlı son sözü yenə də Rusiya deyəcək".