Türkiyədə fəaliyyət göstərən azərbaycanlı iş adamı, "Palmali Group" şirkətinin prezidenti Mübariz Mənsimov maddi cəhətdən çətin günlərini yaşayır.

Axar.az Türkiyənin "Sözcü" qəzetinə istinadən xəbər verir ki, Mənsimovun çətin vəziyyətə düşməsinə səbəb Rusiya Prezidenti Vladimir Putinlə münasibətlərinin pozulmasıdır.

Azərbaycanlı milyarder artıq "Palmali Havacılık" şirkətinə məxsus iki təyyarəni satışa çıxarıb. Satışa çıxarılan təyyarələrdən Falkon 2000S modelinin 25 milyon dollar, Falcon F7 təyyarəsinin isə təxminən 50 milyon dollar qiyməti olduğu bildirilir.

Mənsimov həmçinin 2015-ci ilin aprelində Bodrumda tenderə girərək "Cənnət köyü" adlı ərazini 370 milyon lirəyə alıb. Lakin Mənsimov pulu vaxtında ödəməyib və nəticədə ərazi əlindən çıxaraq, dövlətin hesabına keçib.

200-dən artıq neft tankeri olan azərbaycanlı milyarderin bəzi yaxta və limanlarını da satışa çıxardığı iddia edilir.

"Sözcü" qəzeti maddi cəhətdən çətin günlər yaşayan Mənsimovun sərvətinin 2015-ci ildə 1,3 milyard dollara gerilədiyini yazıb.