Lavrovun Ermənistana səfəri hazırda Qafqazda yaşanan diplomatik hərəkətlilik kontekstində qiymətləndirilə bilər.

Bu sözləri Axar.az-a açıqlamasında Lavrovun gözlənilən Ermənistan səfərini şərh edərkən analitik Vüqar Zifəroğlu deyib. Onun sözlərinə görə, Rusiya maksimum dərəcədə Cənubi Qafqazda olan siyasi müdaxiləsini artırmağa səy göstərir:

"Ermənistan hazırda Moskva üçün ən önəmli kartdır. Azərbaycan Prezidenti İlham Əliyevin Gürcüstana etdiyi uğurlu və nəticəli səfər fonunda Lavrovun İrəvana səfəri təəccüb doğurmamalıdır. Ölkə başçsının Tiflisdən verdiyi mesajlardan da bəlli olur ki, Gürcüstanla Azərbaycan gələcəkdə eyni mövqedən çıxış edəcəklər və regiondakı konfliktlərin həllinə vahid yanaşma sərgiləməklə bir-birinin suverenliyini dəstəkləməkdə davam edəcəklər. Eyni zamanda, hərbi-müdafiə, energetika-tranzit qaz, kommunikasiya sahələrində əməkdaşlıq daha da genişlənəcək. Bu, faktiki olaraq Tiflisin Rusiya və İranla qaz səvdöləşməsi ilə bağlı yaranan narahatlıqları minimuma endirir.Azərbaycanın qazının 2018-ci ildə Türkiyəyə, 2020-ci ildə Avropaya çatdırılmasında tranzit ölkə olaraq Gürcüstan da maraqlıdır. Bu səbəbdən bələ bir siyasi və iqtisadi nöqteyi-nəzərdən əhəmiyyətli olan bir səfərin ardınca Rusiya xarici işlər nazirinin Cənubi Qafqazdakı "vilayət"inə səfəri təbiidir".

Qeyd edək ki, Rusiya Xarici İşlər naziri Sergey Lavrov noyabrın 9-da Ermənistana səfər edəcək.