İranda baş qaldıran etirazlar xalq hərəkatına çevrilə bilər.

Bu sözləri Axar.az-a açıqlamasında analitik Vüqar Zifəroğlu deyib. Onun sözlərinə görə, Azərbaycan türklərinin hüquqlarının pozulması bir yana, insanların heysiyyatı ilə oynamaq İrandakı mövcud sistemə baha başa gələ bilər:

"2006-cı ilin mayında da oxşar hadisə baş vermişdi. O zaman da Azərbaycan türkləri karikaturalarda çox pis şəkildə təhqir olunmuşdu. Bu ayrı-seçkilik nəinki ölkədə, İran KİV-də intensiv hal alıb. Etirazların miqyası genişlənir, aksiyalar insanların hüquqları bərpa edilənə qədər davam edəcək. Bu etirazların hətta xalq hərəkatına çevriləcəyini istisna etmək olmaz. Baş verən hadisələrdə mühafizəkar və islahatçılar yaranan qarışıqlıqdan bir-birlərinə qarşı bir kartplanş kimi istifadə etməyə çalışacaqlar".

Qeyd edək ki, İranda azərbaycanlıların "Kanal-2" telekanalında təhqir olunmasına qarşılıq olaraq, kütləvi etiraz aksiyaları keçirilir. Artıq etirazlar Təbriz də daxil olmaqla İranın şimalındakı bir neçə böyük şəhərə yayılıb.