Türk ordusuna "narıncı həyəcan" anti-terror əməliyyatlarında hərbçilərin daha operativ davranması üçün verilib.

Bunu Axar.az-a Türkiyə Silahlı Qüvvələrinə "narıncı həyəcan" verilməsi məsələsini şərh edən politoloq Vüqar Zifəroğlu deyib. O, son günlərdə Türkiyədə anti-terror əməliyyatlarının artdığını bildirib:

"Son günlərdə Türkiyənin cənub-şərqində aktiv anti-terror əməliyyatları keçirilir. Türkiyə həm PKK-ya, həm də İŞİD-ə qarşı əməliyyatlar aparır. Türk ordusunun bu əməliyyatlarda daha operativ davranması üçün "narıncı həyəcan" verilməsi təbii və normal qarşılanmalıdır. Bu, gecikmiş qərar deyil. Görünür, hazırki əməliyyatların miqyası daha böyük olduğu üçün bu cür qərar qəbul edilib".

Hərbi ekspert Məhərrəm Cahangirov isə həyəcan siqnallarının ordunun döyüş imkanlarını yoxlamaq üçün verildiyini bildirib:

"İstər Türkiyə, istərsə də digər ölkələr həyəcan siqnalı verməklə ordunun döyüş hazırlığı səviyyəsini, imkanlarını və ehtiyaclarını müəyyənləşdirir. Hazırda terror qarşı mübarizəni genişləndirən Türkiyənin ordusuna "narıncı həyəcan" verilməsini normal qarşılamaq lazımdır".

Qeyd edək ki, ötən gün Türkiyə ordusunun Diyarbəkirdə yerləşən Hərbi Hava Qüvvələrinə "hər an hər şeyə hazır olmaq" mənasına gələn "narıncı həyəcan" verilib. Artıq F-16 döyüş təyyarələrinin pilotları mümkün təhlükələrə qarşı "vur" əmrini gözləmədən cavab verəcəklər.