Rusiya-Türkiyə müharibəsinin olacağına ehtimal etmirəm, ancaq iki ölkə arasında üstüörtülü şəkildə gedən qarşıdurmanın sərhədləri genişlənəcək.

Bu barədə Axar.az açıqlamasında analitik Vüqar Zifəroğlu deyib. O, hazırkı məqamda Türkiyə prezidentinin Azərbaycana səfərini xüsusilə qeyd edib:

"Davudoğlunun ukraynalı həmkarı Arseni Yaçenyukla keçirdiyi mətbuat konfransında Rusiyanı ittiham etməsi və post-sovet məkanında bu gün üçün aktuallıq kəsb edən münaqişələrdə şimal ölkəsini səbəbkar olaraq göstərməsi artıq proseslərin Yaxın Şərq və ya Suriya ilə məhdudlaşmayacağı qənaətini yaradır".

V.Zifəroğlu Yaxın Şərqin həmişəkindən daha artıq qaynadığını bildirib:

"Davudoğlu, əslində, Qarabağın işğalında Rusiyanın müstəsna xidmətlərini və bu gün də ermənilərə göstərdikləri dəstəklə bağlı həqiqətləri bütün dünyaya çatdırdı. İndi Rusiya ilə münasibətlərin Suriyada daha da kəskinləşməsi, eləcə də iki gün sonra Ərdoğanın Azərbaycana gözlənilən səfəri çox ciddi məqamlardır. Bu, həm də o deməkdir ki, gec-tez, biz də tərəf seçmək məcburiyyətində qala bilərik".