Davudoğlunun İrana gözlənilən səfərinin Cenevrədə keçiriləcək Suriya sülh danışıqlarına yaxın zamanda olması diqqət çəkir.

Bu barədə Axar.az-a açıqlamasında analitik Vüqar Zifəroğlu bildirib. Onun sözlərinə görə, Türkiyə İrandan aldığı qazın qiymətinə yenidən baxılması məsələsini irəli sürə bilər:

"Səfərin detalları rəsmi şəkildə elan edilməsə də, iki əsas məsələ gündəmdə olacaq. Birincisi, Suriya və İraqda baş verən proseslərlə bağlıdır. İkinci mühüm məsələ isə İrandan alınan qazın qiymətinə təkrar baxılmasıdır. Rəsmi Ankara illərdir ki, buna çalışsa da, ortada bir nəticə yoxdur. Səfər əsnasında müəyyən iqtisadi-ticari əməkdaşlıqlarla bağlı danışıqlar gedə bilər. İran hazırda böyük bazardır. Qərbin İrana istiqamətlənməsi lojistik nöqteyi-nəzərdən türk şirkətərinin qarşısında geniş imkanlar aça bilər. Türklər İran bazarına müəyyən qədər bələddirlər".

V.Zifəroğlu Türkiyə baş nazirinin İrana səfərini olduqca əhəmiyyətli sayır:

"Əsas müzakirə mövzusu Suriya məsələsi olacaq. Səfərin martın 9-da Cenevrədə keçiriləcək Suriya sülh danışıqlarına yaxın zamanda olması diqqəti çəkir".

Qeyd edək ki, Türkiyə Baş naziri Əhməd Davudoğlu martın 4-də İrana səfər edəcək.