Ermənilərin bu aqressiyası nəticə etibarilə Azərbaycanın daha ciddi tədbirlərə əl atması ilə nəticələnə bilər ki, bu da Ermənistan siyasi iqtidarına baha başa gələr.

Axar.az xəbər verir ki, bu sözləri cəbhədəki son vəziyyəti şərh edən analitik Vüqar Zifəroğlu deyib. Analitik Nalbəndyanın Sərkisyanı təkzib etməsini Rusiya XİN rəhbəri Lavrovun zəngi ilə əlaqələndirib:

"Ermənistan hər zaman Rusiyanın iradəsini icra edən bir quberniya olub. Sərkisyanın danışıqlara getməyəcəyi ilə bağlı məlum bəyanatından heç bir gün keçməmiş Nalbəndyanın bunun tam əksini söyləməsi ermənilərin necə absurd və gülünc vəziyyətə düşdüyünü göstərir. Görünür, Sərkisyanın məlum açıqlamasından sonra Lavrovun Nalbəndyana telelefon zəngi erməniləri tələsik bəzi korrektələr etmək məcburiyyətində qoyub".

V.Zifəroğlu ermənilərin mülki əhalini atəşə məruz qoymasını iki amillə izah etməyə çalışıb:

"Artıq neçə gündür yaşayış məntəqələrimizin intensiv atəşə tutulması əsasən iki səbəblə əlaqədardır: 1.Ermənistanın oyuncaq iqtidarı daxili auditoriyanı aprel məğlubiyyətindən sonra sakitləşdirməyə çalışır; 2. Özlərini Rusiyaya mövcud şəraitdə daha baha qiymətə satmağa çalışırlar.

Ermənilər yenidən apreldə itirdikləri mövqelərdən heç olmazsa, kiçik bir hissəni geri qaytarmağa cəhd edəcəklər. Ancaq onların bu aqressiyası nəticə etibarilə Azərbaycanın daha ciddi tədbirlərə əl atması ilə nəticələnə bilər ki, bu da Ermənistan siyasi iqtidarına çox baha başa gələr".

Qeyd edək ki, Ermənistanın son iki gün ərzində kəndlərimizi və mülki əhalini atəşə tutması nəticəsində Ağdamda 2 nəfər həyatını itirib, 7 nəfər isə yaralanıb. Tərtər və Ağdam rayonlarında 110 ev, 2 məktəb, 2 bağça, 1 yarımstansiya dağılıb, fermer təsərrüfatlarına ziyan dəyib, mal-qara güllələnib.