Bakıda keçiriləcək Formula-1 Avropa Qran Prisi üçün nəzərdə tutulan trassdan ilk olaraq keçən pilot 19 yaşlı azərbaycanlı Gülhüseyn Abdullayev olub.

ANS-in məlumatına görə, Gülhüseyn Abdullayev "Euroformula Open"də çıxış edir və o, bu gün səhər saatlarında Bakının mərkəzi küçələrində salınan trassdan yarış avtomobili ilə keçib.

Gənc pilot Bakıdakı trassın xüsusiyyətlərindən danışıb: "Bakı Şəhər Halqası həm yavaş, həm də sürətli döngələrin kombinasiyasından ibarətdir. Ümumiyyətlə çox gözəl qurulub. Digər şəhər treklərindən fərqli olaraq, genişliyi də yetəri qədərdir.

Qoşa Qala qapısı ətrafındakı 8-10-cu döngələr mənə çox maraqlı gəldi. İnanıram ki, orada yarış zamanı çox maraqlı məqamlar olacaq. Əslində həmin döngələrin olduğu hissə çox da asan deyil. Hazırda trek boşdu deyə, bir az asan idi, lakin öndə avtomobillər və ya yavaş sürücü olanda və yaxud da qəza şəraiti olanda oradan keçmək çətin olacaq", - deyə o bildirib.

Pilot Avropa Qran Prisinin ən maraqlı hissəsinin Qala divarları istiqamətində Qoşa Qala qapılarınadək olacağında əmindir.