ABŞ-da Demokratlar Partiyasından prezidentliyə namizəd, sabiq dövlət katibi Hillari Klinton lazımi səsi toplayaraq seçkilərdə iştirak hüququ qazanıb.

Axar.az xəbər verir ki, 2384 partiya nümayəndəsinin səsini qazanan xanım Klinton ABŞ-ın 240 illik tarixində ilk qadın namizəd olub.

Qeyd edək ki, Demokratların ilkin seçki prosesi sabah Kaliforniya, Montana, Nyu Cersi, Nyu Mexiko, Şimali Dakota və Cənubi Dakota ştatlarında, 14 iyunda isə paytaxt Vaşinqtonda keçiriləcək.

Respublikaçı Partiyadan isə iş adamı Donald Tramp rəqiblərinin geri çəkilməsindən sonra 26 mayda 1237 nümayəndənin səsini qazanaraq prezidentliyə vahid namizəd olub.

Buna baxmayaraq, hər iki partiyanın rəsmi namizədi iyulda keçiriləcək qurultaylarda bəlli olacaq.