İngiltərənin sabiq baş naziri Toni Bler 2003-cü ildə İraqın işğalında əli olmadığını açıqlayıb.

Axar.az xəbər verir ki, "Blumberq" telekanalına müsahibə verən məşhur siyasətçi İşçi Partiyasının solçu lideri Ceremi Korbini tənqid edib:

"Hərbi cinayətkar olmaqda və Səddam Hüseyni devirməkdə günahlandırılıram. Hərbi cinayətkar deyiləm. Yaxşı, bəs Ceremi Korbin nə edib? Suriyada insanların üzərinə çəllək bombaları atılarkən, açlıqdan ölərkən, eləcə dayanır və heç nə etmir".

Keçmişdə verdiyi çətin qərarlar səbəbindən o qədər də sevilmədiyini etiraf edən Bler indiki liderlərin sosial şəbəkə vasitəsi ilə məşhurlaşdığını deyib:

"Mən plakatlar üzərində olan, nifrət edilən adamam. Çətin qərarlar vermişəm. Ceremi isə bu şüarı tutan adamdır. Biri gücün siyasəti, digəri isə etirazın siyasətidir. İngiltərədə Korbin və ABŞ-da Donald Tramp kimi siyasətçilər ictimai media sayəsində yüksəliblər".

Xatırladaq ki, 63 yaşlı Toni Bler 1997-2007-ci illərdə İngiltərənin baş naziri olub. 2003-cü ildə İraqın işğalının əsas memarı olan Bler tez-tez bu əməlinə görə tənqid olunur.