Kreml Qara Dəniz İqtisadi Əməkdaşıq Təşkilatı Parlament Assambleyasının toplantısına Krım administrasiyasının nümayəndələrini dəvət edərəsə, digər ölkələri pis vəziyyətdə qoyacaq.

Axar.az xəbər verir ki, bu haqda politoloq Elxan Şahinoğlu açıqlama verib. Politoloq QDİƏT PA-nın Moskvada gözlənilən 47-ci toplantısını şərh edib:

"QDİƏT-ə hazırda Rusiya sədrlik edir. Moskva toplantısında təşkilata üzv ölkələrin iqtisadi, ticarət və mədəni əlaqələrinə dair hüquqi baza formalaşmalıdır. Toplantıya Albaniya, Azərbaycan, Bolqarıstan, Ermənistan, Yunanıstan, Gürcüstan, Moldova, Rumıniya, Serbiya və Türkiyə dəvət olunub. Rəsmi Bakının mövqeyi belədir ki, Dağlıq Qarabağ münaqişəsi həll olunmayana qədər Azərbaycan işğalçı Ermənistanla heç bir inteqrasiya layihəsində iştirak etməyəcək. Düzdür, Azərbaycan təşkilatın üzvüdür, ancaq bu simvolikdir. Kreml bu toplantıya Krım administrasiyasının nümayəndələrini dəvət edərsə, digər ölkələri də pis vəziyyətdə qoyacaq".

Politoloq bildirib ki, rəsmi Tiflis Moskva toplantısına aşağı səviyyəli nümayəndə heyəti göndərə bilər:

"Ukrayna kimi Gürcüstanın da təşkliat çərçivəsində Rusiya ilə əməkdaşlığı genişləndirməsi problematikdir. Bundan başqa, Rusiya Türkiyə ilə siyasi əlaqələri dondurub, iqtisadi əməkdaşlığı minimuma endirib, Moldovanın qərbyönlü siyasətini tənqid edir, Rumıniyada ABŞ-ın raketlərdən müdafiə sistemlərini özünə təhlükə sayır, Bolqarıstanın Qara dənizin dibi ilə boru xəttindən imtina qərarından isə narazıdır.

Bütün bunları nəzərə alsaq, indiki halda QDİƏT-in fəaliyyəti nominal xarakter daşıyır. Rusiyanın təşkilata üzv dövlətlərin bir çoxu ilə münasibətləri gərginləşdirməsi regional əməkdaşlıq imkanlarını minimuma endirdi. Halbuki təşkilat 1992-ci ildə təsis olunduqda qarşısına böyük hədəflər qoymuşdu".

Qeyd edək ki, Qara Dəniz İqtisadi Əməkdaşlıq Təşkilatı Parlament Məclisi Baş Assambleyasının (QDİƏT PA) 47-ci iclası iyunun 28-30-da Moskvada keçiriləcək.