Türk dünyasının fəal qadınlarından olan Madelet Başustaya Avrasiya Universitetinin Fəxri Doktoru adı verilib.

Axar.az xəbər verir ki, alim və tələbələrin iştirak etdiyi tədbirdə öncə universitetin rəhbərliyi çıxış edərək, Madelet Başustanın türk qadınlarının dünyada geniş tanıdılmasında rolu, Azərbaycan-Türkiyə qardaşlığının güclənməsində fəaliyyəti barədə geniş danışıb. Daha sonra ona universitetin qərarı ilə fəxri doktorluq verildiyi bildirilib və bununla bağlı sənəd, diplom və medal Madelet Başustaya təqdim edilib.

Millət vəkili, siyasi elmlər doktoru Qənirə Paşayeva çıxışında Madelet Başustanın gördüyü böyük işlərdən danışıb və Avrasiya Universitetinə bu addımı üçün təşəkkürünü bildirib.

Avrasiya Beynəlxalq Mətbuat Fondunun sədri Umud Rəhimoğlu da yaxından tanıdığı Madelet Başustanın həyat yolundan danışıb, gənc qızları ondan öyrənməyə çağırıb.

Madelet Başustanın həyat yoldaşı, dəyərli ziyalı Hüseyn Başusta çıxış edərək Azərbaycanda onlara göstərilən böyük diqqət və məhəbbət üçün təşəkkürünü bildirib.

“Bir millət, iki dövlət” anlayışı hər zaman bizim üçün çox anlamlıdır və belə də olacaq” deyən Madelet Başusta fəxri doktorluq adına qardaş Azərbaycanda layiq görülməyinin böyük məna verdiyini qeyd edib.

Tədbir çərçivəsində Avrasiya Universitetinin rektoru Nazim Hüseynli ilə qonaqlar arasında geniş görüş və müzakirələr də aparılıb.

Qeyd edək ki, ötən gün Madelet Başustanın Bakıda kitabının təqdimatı keçirilmişdi.