Paşinyanın özü də II Qareginin istefaya göndərilməsində maraqlıdır.

Axar.az xəbər verir ki, bu sözləri erməni katolikos II Qareginin istefaya razılaşması ilə bağlı məsələyə münasibət bildirən analitik Ehtiram Aşırlı deyib. O bildirib ki, katolikosla bağlı ciddi ittihamlar var:

“Bütün etirazlara rəğmən istefa verməyən II Qaregini istefaya vadar edən səbəb ermənilərin onun 2008-ci il hadisələri zamanı dinc sakinlərə qarşı etdiyi gülləbarana münasibətidir. Belə ki, həmin ərəfədə mitinqçilərin güllələnməsinə din adamı II Qaregin də razılıq verib. Xüsusən də sonuncu günaha görə katolikosun məsuliyyətə cəlb olunmasını tələb edənlər də var. Hələ bir neçə il bundan əvvəl də sosial şəbəkədə fəaliyyət göstərən erməni vətəndaş təşəbbüsünün üzvləri “Biz katolikosun istefasını tələb edirik” adlı xüsusi bir müraciət yaymışdılar. Həmin müraciətdə ermənilər katalikos II Qaregini erməni kilsəsinin gələcəyinə təhlükə yaradan korrupsiyaya uğramış din xadimi kimi təqdim edirdilər. Bundan başqa onlar katolikosu erməni kilsəsi ilə xalq arasında böyük bir maneə yaratmaqda, kilsəyə güvənməyən və hörmətsizlik edən insanları ora toplamaqda, kilsə ilə hakimiyyət arasında yaranan qeyri-təbii və şübhəli “qardaşlıq”da və ən nəhayət, bizneslə məşğul olmaqda ittiham edirdilər”.

Analitik qeyd edib ki, Paşinyan xalqın bu etirazından istifadə edir:

“Ermənistanda din amili böyük əhəmiyyət kəsb edir. Hakimiyyətə kim gəlir- gəlsin, mütləq kilsənin də dəstəyini almağa çalışır. Bu baxımdan Paşinyan da kilsəni öz nəzarətinə keçirmək istəyir”.

Qeyd edək ki, dünən “Joxovurd” qəzeti II Qareginin istefaya getməyə hazırlaşdığı barədə informasiya yayıb.