DESFA-nın səhmlərinin 66 faizinin Avropanın enerji şirkətlərindən ibarət konsorsiumun nəzarətinə keçməsi heç də rəsmi Afinanın “qabağa düşməsi” anlamına gəlmir.

Axar.az xəbər verir ki, bu sözləri Yunanıstanın DESFA şirkətinin səhmlərini Avropaya satması ilə bağlı danışan Neft Araşdırmalar Mərkəzinin rəhbəri İlham Şaban deyib. Ekspert bildirib ki, Yunanıstan hökuməti 5 ilini boşa verdi və bu müddətdə həm görüləcək işlərin həcmindən, həm də hökumətə gələcək dividentlərdən məhrum oldu:

“SOCAR-ın vaxtilə Yunanıstan tərəfinə etdiyi kommersiya təklifləri DESFA-nın 66 faizinə yiyələnən Snam/Enagas/Fluxys konsorsiumunun təkliləri ilə müqayisədə heç də daha az cəlbedici deyildi. 2013-cü ildə SOCAR DESFA-nın eyni həcmli paketinə 400 milyon avro təklif etməklə tenderin qalibi elan edilmişdi. Ancaq bir müddət sonra Avropa Komissiyası SOCAR-ın dövlət şirkəti olmasını əsas gətirərək, ona nəzarət paketinin deyil, 49 faiz səhmin satılmasını məsləhət gördü. Yunanıstan hökuməti də razılaşdı, ancaq 400 milyon avroya elə 49 faizi satmaq istəyirdi. SOCAR bu zaman şirkətdən müəyyən güzəştlər istəmişdi ki, qoyulacaq investisiyaların geri qaytarılması onun biznes maraqlarına uyğun olsun. Ancaq Yunanıstanda hökumətlər dəyişdikcə bu proses uzandı. Sonda DESFA səhmlərinin 66 faizini 535 milyon avroya Snam/Enagas/Fluxys konsorsiumuna satdı. Əslində, Avropa hökuməti Azərbaycanın yunanlarla sövdələşməsinin qarşısını aldı. Ancaq bu o demək deyil ki, rəsmi Afina istədiyində “qabaq düşdü”.

Ekspert DESFA-nın səhmlərinin Avropanın enerji şirkətlərindən ibarət konsorsiumun nəzarətinə keçməsinin Cənub Qaz Dəhlizi layihəsinin kommersiyasına təsirindən də söz açıb:

“Sözügedən məsələnin birbaşa magistral kəmərlərin fəaliyyətinə heç bir aidiyyəti yoxdur, çünki Yunanıstan bazarında qazın paylanması ilə məşğul olacaqlar. SOCAR DESFA-nın səhmlərinə sırf biznes maraqları baxımından sahib olmağa çalışırdı. Biri var qazı şirkətlərlə birgə topdan satasan, biri var müştərək qaz daşıyıcısı olasan, biri də var onun parəkəndə satışında da iştirak edəsən. Bu zaman şirkətin qazancı daha çox olur. Bütün bunlara baxmayaraq, SOCAR hazırda daha sərfəli şərtlərlə digər Avropa ölkələrində danışıqlar aparır”.

Qeyd edək ki, DESFA səhmlərinin 66 faizini Snam/Enagas/Fluxys konsorsiumuna satıb.

DESFA-nın səhmlərinin əldə olunmasında SOCAR-dan əlavə, İtaliyanın SNAM şirkəti də maraqlı idi. Bununla belə, hər iki şirkət səhmlərin 66 faizi üçün müəyyən olunan 400 milyon avro qiymətini yüksək hesab edirdi.

SOCAR 2013-cü ildə DESFA-nın səhmlərinin əldə olunması üzrə tenderdə qalib gəlmişdi.