Ana səhifə Kult Musiqi |
Dekabrın 9-u M.Maqomayev adına Azərbaycan Dövlət Filarmoniyasında tanınmış bəstəkar Sərdar Fərəcovun 60 illik yubileyinə həsr olunan tədbir keçirilib.
Axar.az xəbər verir ki, tədbirdə Azərbaycan Bəstəkarlar İttifaqının katibi, əməkdar incəsənət xadimi Zemfira Qafarova çıxış edərək tanınmış bəstəkarın milli musiqimizin inkişafındakı xidmətlərindən, yaradıcılığından danışıb. Həmçinin TÜRKSOY-un baş katibi Düsen Kaseinov yubilyarı təbrik edərək ona yaradıcılığında uğurlar diləyib.
Tədbirdə xalq artisti, dirijor Fəxrəddin Kərimovun rəhbərliyi ilə Ü.Hacıbəyli adına Azərbaycan Dövlət simfonik orkestri çıxış edib. Konsertdə “Koroğlu” simfonik freskası, “Şah Xətai” simfoniya-dastan, “Sonsuzluq karvanı” oratoriyasından hissələr süita və başqa əsərlər səsləndirilib.
Qeyd edək ki, bəstəkarın əsərləri Avropa, Amerika və keçmiş SSRİ ölkələrində müxtəlif ansambllar və ifaçılar tərəfindən səsləndirilib. O, kamera-instrumental, vokal, vokal-simfonik və xor üçün yazılmış əsərlərin, simfonik, opera əsərlərinin, musiqili komediyaların, eləcə də musiqili teatr səhnələri üçün və kino musiqilərinə həsr olunmuş əsərlərin müəllifidir.
Tarix
2017.12.10 / 01:39
|
Müəllif
Aytac Araz
|