Qazaxıstanın paytaxtı Astana şəhərinin 20 illik yubileyi şərəfinə "Astananın səsi" («Voice of Astana») I beynəlxalq estrada musiqi müsabiqəsi keçirilib.

Kult.az xəbər verir ki, Qazaxıstan Mədəniyyət və İdman Nazirliynin təşkilatçılığı ilə hər il keçiriləcək dünya səviyyəli müsabiqənin yekun nəticələri açıqlanıb.

Beynəlxalq müsabiqədə Azərbaycanın təmsilçisi, əməkdar artist, opera sənətçisi İlham Nəzərov 3-cü yeri qazanıb. Birinci turda İlham Nəzərov Toleqen Muxametjanovun Qazaxıstan Prezidenti Nursultan Nazarbayevin sözlərinə bəstələdiyi “Astana, mənim şəhərim” (Qorod moy Astana) mahnısını ifa edib.

Müsabiqəyə Azərbaycan, İtaliya, Böyük Britaniya, Çin, Gürcüstan, Tatarıstan, Hindistan, Rusiya, Bolqarıstan, İsrail, Özbəkistan, Qırğızıstan, Estoniya, Türkiyə və Qazaxıstandan iştirakçılar qatılıb.