İsrailin “İmageSat İnternational” şirkəti Suriyada Rusiyaya məxsus beşinci nəsil Su-57 təyyarələrinin peykdən çəkilmiş fotolarını paylaşıb.

Axar.az xəbər verir ki, şirkətin yayımladığı fotoların Rusiyanın hələlik silahlanmaya qəbul etmədiyi Su-57 təyyarələrini Suriyadakı Hmeymim hərbi bazasına göndərməsi barədə sosial şəbəkələrdə yayılan iddianı təsdiqlədiyi bildirilib.

“Su-57-lərin hərbi əməliyyatlara cəlb edilib-edilməyəcəyi məlum deyil. “İmageSat İnternational” hesab edir ki, bu maşınlar hələlik inkişaf mərhələsində olduğu üçün texniki sistemləri sınaqdan keçirmək və kəşfiyyat məlumatlarını toplamaq üçün istifadə ediləcək”, - şirkət fotonu şərh edib.

Qeyd edək ki, “İmageSat İnternational” şirkəti müştərilərinə texniki imkanlarını göstərmək üçün Suriyadakı Hmeymim bazasından mütəmadi olaraq peyk görüntüləri paylaşır.