Gənclərin gecə saatlarına qədər barlarda qalması ilk növbədə cəmiyyətdən çox, elmi cəhətdən düzgün deyil.

Bu sözləri ekspert Rəşid Mahmudov 18 yaşına çatmayan şəxslərin gecə klublarında gecə saatlarına qədər qalmaması haqda qanun layihəsinin müzakirəsi ilə bağlı Axar.az-a danışarkən deyib. O, qanunun çox doğru olduğunu bildirib:

"Tibbi sahədə belə bir qanun var ki, gənc oğlanlar 22, qızlar isə 19 yaşına kimi nəzarət altında olmalıdır. Çünki çox gəncdirlər, gedib pis əməllərə - narkotikə, içkiyə qurşana bilərlər. Nə işləri var barda? Gedib faydalı işlərlə məşğul olsunlar, elm öyrənsinlər. Mən bu qərarı çoxdan gözləyirdim və sonuna kimi də dəstəkləyirəm".

Qeyd edək ki, Milli Məclisin Gənclər və idman komitəsinin iclasında "Gənclər siyasəti haqqında" qanuna əlavələr müzakirəyə çıxarılıb. Əlavələrə əsasən, qanuna 5.6 maddəsi əlavə edilir və maddədə göstərilir ki, 18 yaşı tamam olmayan gənclərə tütün məmulatlarının, spirtli içkilərin satışı və bu məhsullardan istifadə qadağan edilir. Qeyd olunan yaş kateqoriyasına qədər olan gənclərə şans və mərc oyunlarında birbaşa və ya dolayı yolla iştirak da yasaqlanır.

Maddənin digər bəndində göstərilir ki, himayəsində olduğu şəxslərdən ən azı birinin iştirakı olmadan saat 20:00-dan sonra bar, diskoteka və gecə klublarında iştirak da qadağandır.