Millət vəkili Qənirə Paşayeva Misir Milli Qadın Şurasının prezidenti, nazir Maya Morsi başda olmaqla, Misir qadın millət vəkilləri, Beynəlxalq Biznes və Peşəkar Qadınlar Federasiyasının Misir üzrə rəhbəri Omnia Fahmi və təşkilatın rəsmiləri ilə görüşüb.

Axar.az xəbər verir ki, görüş zamanı millət vəkili Azərbaycanın bütün istiqamətlərdə Misirlə əməkdaşlığın inkişafına önəm verməsindən danışıb. O, müzakirələr zamanı misirli nümayəndələrə Azərbaycanda qadınların cəmiyyətdə rolunun artırılması istiqamətində görülən işlər və xüsusilə Azərbaycan həqiqətləri ilə bağlı məlumatlar verib.

Q.Paşayeva görüş zamanı Misir nümayəndə heyəti üzvlərinə 1 milyon azərbaycanlının Ermənistanın işğalı nəticəsində öz yurd-yuvalarından qaçqın və məcburi köçkün düşməsi, rəsmi İrəvanın onların öz ev-eşiyinə dönməsinə imkan verməməsi barədə məlumatlar verib.

İki ölkənin qadın siyasətçiləri, iş adamları, qeyri-hökumət, KİV nümayəndələri Azərbaycanla Misir arasında qarşılıqlı dəstəyin və əməkdaşlığın daha da sürətlənəcəyinə inamını vurğulayıblar.

Sonda millət vəkili nümayəndə heyətinə Azərbaycan həqiqətlərinə, tarix və mədəniyyətinə aid kitablar, sənədli filmlər də təqdim edib.