Millət vəkili Qənirə Paşayevanın Qaziantep Universitetində Qarabağ həqiqətləri ilə bağlı tədbirlərin artırılması təklifi dəstəklənib.

Axar.az xəbər verir ki, millət vəkili Qaziantep Universitetinin rektoru Əli Gür və gənclərlə görüşündə Qarabağ həqiqətlərinin daha geniş yayılmasından və qondarma erməni soyqırımı yalanlarına qarşı mübarizədən söz açıb.

Əli Gür Azərbaycanla Türkiyə arasında bütün sahələrdə, o cümlədən təhsil sahəsində əlaqələrin inkişafından məmnunluğunu ifadə edib.

Millət vəkili Azərbaycan universitetləri ilə Türkiyə ali təhsil müəssisələri arasında əməkdaşlığın genişlənməsinin vacibliyini qeyd edib:

“Qaziantep Universitetində təhsil alan azərbaycanlı tələbələrin sayının getdikcə artması sevindirici haldır. Onların burada özlərini öz vətənlərindəki kimi hiss etmələri və keyfiyyətli təhsil almaları üçün yaradılan hər cür şəraitə görə təşəkkür edirəm”.

Q.Paşayeva bildirib ki, Azərbaycan həqiqətləri, Dağlıq Qarabağ münaqişəsi, Xocalı soyqırımı ilə bağlı konfransların artmasına ehtiyac var.

Görüş zamanı Azərbaycan-Türkiyə münasibətləri, bölgədə getdikcə daha da gərginləşən vəziyyət ətrafında da fikir mübadiləsi aparılıb.

Millət vəkili Qaziantep Universitetində təhsil alan azərbaycanlı tələbələrlə bağlı bir sıra təkliflərlə çıxış edib. Deputat həmçinin Qaziantep Universitetinin müəllimləri, burada müəllimlik edən alimlərimiz və digər türk toplumlarından olan tələbələrlə də görüşüb.