Bəziləri sanki pusquda dayanmış kimi ən adi prosedur qaydalarını problem olaraq qabardıb, şirkətin adına xələl gətirmək niyyətini güdürlər.

Axar.az xəbər verir ki, bu sözlər "Palmali" Şirkətlər Qrupunun Bakı ofisindən şirkətə məxsus gəminin saxlanılması ilə bağlı xəbərə cavabda əksini tapıb. Məlumatda bildirilir ki, Palmali Dənizçilik Şirkətinə (Palmali Shipping Company) məxsus "Ağsu" yük tankerinin Danimarkanın Kalundborg limanında saxlanılması ilə bağlı məlumatlar həqiqəti əks etdirmir:

“Ağsu" adlı gəmi Rusiya bayrağı altında üzür. Avropa Birliyi ölkələrinin sanksiyalarına görə, bu ölkənin bayrağı altında üzən gəmilər daha ciddi yoxlanışdan keçir. O cümlədən şirkətimizə məxsus gəmi də standartlara uyğun olaraq adi yoxlanış nəzarətindən keçir. Bunu gəminin saxlanılması kimi ifadə etmək çox gülüncdür. "Pal shipping trader three" şirkətinin mülkiyyətində olan gəmidə texniki çatışmazlıqların olması səbəbindən saxlanılması, "Ağsu" tankerinin səfərə çıxmasına qadağa, gəmiyə həbs qoyulması barədə sənəd tərtib edilməsi xəbərlərinin heç biri həqiqətə uyğun deyil”.

Qeyd edək ki, dünən Türkiyənin “Dəniz xəbər” agentliyi Palmali Dənizçilik Şirkətinə (Palmali Shipping Company) məxsus "Ağsu" yük tankerinin Danimarkanın Kalundborg limanında saxlanılması ilə bağlı məlumat yayıb.