Millət vəkili Qənirə Paşayeva Avstraliya Qadın şurasının rəhbəri Andrea Meyson, Avstraliyanın Cinsi ayrıseçkilik məsələləri və İnsan haqları üzrə komissarı Keyt Cenkins, Peşəkar təhsil və bacarıqlar üzrə nazir müavini Karen Endryus və keçmiş baş qubernator Dame Kventin Bryusla görüşüb.

Axar.az xəbər verir ki, millət vəkili Avstraliya rəsmiləri ilə görüşdə Azərbaycanın iki ölkə arasında əlaqələrin və dostluğun inkişafına verdiyi böyük önəmdən danışıb.

Müzakirələr zamanı millət vəkili Azərbaycanın iqtisadi potensialı, mədəniyyəti və Qarabağ həqiqətləri ilə bağlı məlumatlar verib.

Avstraliyanın da Azərbaycanla əməkdaşlığın, dostluğun inkişafına böyük önəm verdiyini deyən Avstraliya rəsmiləri iki ölkə arasında münasibətlərin sürətlə inkişaf edəcəyinə inandıqlarını vurğulayıblar.

Görüşdə iki ölkənin qadın siyasətçiləri, iş adamları, qeyri-hökumət, KİV nümayəndələri arasında münasibətlərin və qarşılıqlı səfərlərin vacibliyi, əməkdaşlığın inkişafı üçün böyük perspektivlərin olduğu vurğulanıb.