2018.09.25, 15:40

“Rusiya Vertolyotları” holdinqi ilə Azərbaycanın “Silk Vey Helikopter Servises” şirkətinin birgə xidmət mərkəzi fəaliyyətə başlayıb.

Axar.az xəbər verir ki, bunu “RİA Novosti” agentliyinə açıqlamasında “Rusiya Vertolyotları” holdinqinin baş direktor müavini İqor Çeçikov deyib.

“Bu layihə üzrə işlərimiz plan üzrə gedir. Bu ilin iyununda biz artıq “Silk Vey”lə birgə onlara məxsus olan bir vertolyotu təmir etmişik. Hazırda ikinci vertolyotun təmiri aparılır. Bu gücün mərhələli şəkildə artırılmasıdır”, – deyə o bildirib.

O, hazırda xidmət mərkəzindəki personalın təliminin aparıldığını və buraya yeni qurğuların tədarükünün planlaşdırıldığını söyləyib:

“Bir il əvvəl Azərbaycan tərəfindən olan tərəfdaşımız öz gücünü artırıb. Bu mərkəz hələlik sahə təmirlərinin icrası üçün baza meydanıdır. Əgər bundan sonra inkişaf olsa, yeni mərkəz tamtəminatlı xidmət və təmir mərkəzinə çevrilə bilər”.

Qeyd edək ki, ADEX-2016 sərgisində “Rusiya Vertolyotları” “Silk Vey Helikopter Servises”lə Azərbaycanda Rusiyanın Mi-8/17 mülki vertolyotlarının təmiri üçün birgə müəssisənin yaradılması haqqında müqavilə imzalamışdı.