İcra məmurları yol hərəkətini pozan piyadalara tətbiq edilən cərimələrə və onların ödənilməsinə ciddi yanaşmalıdır.

Bu sözləri Axar.az-a danışan yol hərəkəti üzrə ekspert Ərşad Hüseynov deyib.

Onun sözlərinə görə, ödənilməyən cərimə ən çox 32 manata yüksələ bilər.

"İnzibati Xətalar Məcəlləsinin 153-cü maddəsinə uyğun olaraq piyadalar yol hərəkəti qaydalarını pozduqda tətbiq olunmuş cəriməni bir ay müddətində könüllü ödəməlidirlər.

Bir aylıq müddət ərzində cərimə ödənişi könüllü icra olunmazsa, ayın tamamından sonra hər gün üzərinə cərimənin 1%-i məbləğində əlavələr olunur. Bu əlavələr maksimum 2 ay müddətində davam edə bilər. Bu isə o deməkdir ki, cərimə toplam 60%, yəni 32 manata yüksələ bilər", - deyə ekspert bildirib .

Ə.Hüseynov əlavə edib ki, cərimə ödənilməzsə, polis orqanı piyadanın evinə icra məmurlarını göndərməlidir:

"Belə olan vəziyyətdə isə cərimə icra haqqında qanunla ödənilir. İcra məmurları bu mövzuya ciddi yanaşmalıdır. Lakin praktika göstərir ki, onlar tərəfindən bu mövzuya ciddi yanaşılmır".

Qeyd edək ki, yol hərəkəti qaydalarını pozan şəxslər İnzibati Xətalar Məcəlləsinin tələblərinə uyğun olaraq 20 manat məbləğində cərimə olunurlar.