Dünən – iyunun 10-da Muzey Mərkəzində Bakı-2015 I Avropa Oyunları münasibətilə görkəmli Azərbaycan rəssamlarının əsərlərindən ibarət "Avropa haqqında düşüncələr" adlı sərgi keçirilib.

Axar.az xəbər verir ki, sərgi Azərbaycan Respublikasının Mədəniyyət naziri Əbülfəz Qarayevin nitqi ilə açıq elan olunub:

"Hamınızı "Avropa haqqında düşüncələr" adlı sərgidə görməkdən böyük məmnunluq duyuram. Bu sərgi Avropa Oyunlarının mədəni standartıdır. Sərgi Azərbaycan rəssamlarının Avropa haqda təsəvvürlərini, mədəniyyətlərarası dialoqu özündə əks etdirir".

Azərbaycan Respublikasının Mədəniyyət və Turizm Nazirliyi tərəfindən təşkil olunan sərgidə görkəmli Azərbaycan rəssamlarının Azərbaycan Dövlət Rəsm Qalereyasının fonduna aid olan əsərləri təqdim edilib. Onların arasında Mikayıl Abdullayev, Nadir Əbdürrəhmanov, Lətif Feyzullayev, Əyyub Hüseynov, Nəcəfqulu İsmayılov, Davud Kazımov, Nadir Qasımov, Ağa Mehdiyev kimi rəssamların əl işləri nümayiş olunub.

Sərginin təşkilində əsas məqsəd Azərbaycan Dövlət Rəsm Qalereyasının fondunda illər ərzində toplanmış və son dərəcə böyük bədii dəyərə malik olan əsərləri həm yerli tamaşaçılara, həm də xarici qonaqlara təqdim etməkdir.

Rəssamlar İttifaqının sədri Fərhad Xəlilovun nitqi ilə davam edən tədbirdə rəssam bu sərginin Azərbaycan rəssamlarının Avropa Oyunlarına töhfəsi kimi dəyərləndirib:

"Bütün Azərbaycan rəssamları Avropa Oyunlarının məhz bizim ölkəmizdə keçiriləcəyi üçün böyük iftixar duyur. Bu rəsm əsərləri Azərbaycan mədəniyyətini, o cümlədən, rəssamlığını bütün Avropaya nümayiş etdirmək iqtidarındadır".