I Avropa Oyunları ərəfəsində Azərbaycanın mədəniyyətini, tarixi irsini və s. təbliğ etmək üçün paytaxtın muzey və qalereyalarında, tarixi məkanlarında, mərkəzi meydanlarında sərgilər təşkil olunur, qonaqlara buklet və kitabçalar paylanılır.

Axar.az xəbər verir ki, dünən "Milli geyimlərimizin dünəni və bu günü" adlı layihə həyata keçirilib. Layihənin keçirilməsində əsas məqsəd xarici ölkələrdən gəlmiş idmançı və turistlərə Azərbaycanın zəngin mədəniyyətinin bir parçası olan milli geyimlərimizi və milli rəqslərimizi əyani olaraq nümayiş etdirmək olub.

Paytaxtın "Azneft" meydanından başlayan tədbirə şəhər sakinləri, xarici turistlər də qatılaraq milli geyimli oğlan və qızların rəqslərini izləyib, daha sonra "Yallı" sədaları altında əl-ələ veriblər. Tədbirdə "Sarı gəlin" xalq mahnısı da ifa edilib.

Sonda turistlərə və şəhər sakinlərinə Azərbaycan bayrağı, ölkəmiz haqqında buklet və kitabçalar, mədəniyyət və tariximizi özündə əks etdirən müxtəlif suvenirlər paylanılıb.