Əməkdar artist Cabir İmanovun və ya Tahir İmanovun hansı məzhəb və ya dini hərəkatın üzvü olduğunu bilmirəm. Amma Türkiyədə olduğu kimi, Azərbaycanda da FETÖ təhlükəsi (9 il əvvəl hərbi çevrilişə cəhd etmiş təşkilat – red.) ilə yanaşı, sələfilik təhlükəsi də mövcuddur.

Axar.az xəbər verir ki, bu sözləri Globalinfo.az-a ilahiyyatçı Elşad Miri deyib.

Onun sözlərinə görə, insanlar arasında belə fikir formalaşıb ki, saqqallı, topuqdan yuxarı şalvar geyinən şəxslər sələfi və ya vəhhabi ola bilər:

“Lakin bu, həqiqəti əks etdirmir. Çünki bu gün həmin əqidənin üzvləri saqqalsız və müasir formada geyinir, yalnız yaxın çevrələri onun vəhhabi olduğunu bilir. Onlar müəyyən qurumlarda çalışır, söz sahibidirlər. O məclisdə fəaliyyətlərini müşahidə etmək mümkündür. Başqa qurumlarda da onların fəaliyyəti barədə məlumat əldə etmək olur. Mən şəxsən mövzu ilə bağlı çıxışımdan sonra üzləşdiyim reaksiyalardan bunun şahidi oldum”.

E.Miri qeyd edib ki, məzhəbçilik dövlət qurumlarında da müşahidə olunur:

“Dini Qurumlarla İş üzrə Dövlət Komitəsində belə hallara rast gəlmək mümkündür. Orada çalışan şəxslərdən soruşsanız ki, namaz qılmayan, baş örtməyən, oruc tutmayan və ya zina edən şəxslər haqda hökm nədir, verdikləri cavablar məzhəblərin təlimindən kənara çıxmır. Bu məsələni düzgün analiz, təhlil etmək və üzərində işləmək lazımdır. Dediyim kimi, sələfilik məsələsi artıq saqqal və bığla, topuqdan yuxarı şalvarla bağlı deyil, tamamilə fərqli bir təkamülə malikdir. Allah Quranda buyurur ki, Allahın ipindən möhkəm yapışın və firqələrə bölünməyin. Məzhəbçilik və təriqətlərə bölünmək böyük günahdır. Təəssüf ki, Azərbaycanda bu sahə ilə məşğul olanların çoxu müəyyən məzhəbin üzvüdür və bu vəziyyət geniş yayılıb”.