Ermənistan və Azərbaycan arasında (Zəngəzur dəhlizi üzrə) birbaşa dəmir yolu yaradılarsa, Gürcüstan öz ərazisindən Ermənistana 1,5-2 milyon tonluq daşımanı itirmək riski ilə üzləşəcək.

Axar.az Teleqraf-a istinadla xəbər verir ki, bunu Gürcüstanın Nəqliyyat Dəhlizləri Tədqiqatları Mərkəzinin direktoru Paata Tsaqareişvili Ermənistan KİV-ə deyib.

Ekspert Azərbaycan ərazisi ilə Ermənistana neft tədarükünə də diqqət çəkərək, Tiflisin Zəngəzur dəhlizinə qarşı olmasını bu sözlərlə izah edib:

“Əgər tankerlər Gürcüstan ərazisindən keçərsə, təxminən 620, Azərbaycan vasitəsilə isə 500 kilometr yol qət etməli olacaq. Bu halda Gürcüstan dəmir yolunun yalnız 110 kilometrlik hissəsindən istifadə ediləcək. Hazırda Ermənistana ixracın əsas hissəsi Gürcüstan ərazisindən limanlar və ya Yuxarı Lars keçid məntəqəsindən - üç dəfə uzun olan marşrutdan keçir. Bu halda, bütün infrastrukturdan istifadə olunur: limanlar, dəmir yolları, avtomobil nəqliyyatı və digər xidmətlər. Bu, ölkəyə əlavə gəlir gətirir. Tranzit məsafələrinin azaldılması mənfəətin azalmasına səbəb olacaq.

Gələcəkdə İrəvan və Bakı birbaşa avtomobil və ya dəmir yolu əlaqələri qura bilsə, Gürcüstan boru kəməri rolunu da itirəcək və 2 milyon tona qədər tranzit yükdaşımasını da itirə bilər. Bu yük Ermənistan vasitəsilə “Tramp yolu” (və ya Zəngəzur dəhlizinə) yönləndiriləcək”.

Söhbət hazırda Rusiyadan Ermənistana Gürcüstan limanları vasitəsilə çatdırılan ümumi həcmi 0,5 milyon ton olan maye yüklər və neft məhsullarından gedir. Ekspert hesab edir ki, bu mallar Rusiyadan Ermənistana Azərbaycan vasitəsilə göndəriləcək. Təxminən 200 000 ton Türkmənistan Aİ-92 benzini də Gürcüstandankənar göndərilə bilər.

Tsaqareişvili vurğulayıb ki, eyni şey təxminən 100 000-150 000 ton ağırlığında olan və Ermənistanın hazırda Gürcüstan vasitəsilə idxal etdiyi Türkiyə mallarına da aiddir. Bu mallar hazırda Bakı-Tbilisi-Qars xətti (Orta Dəhlizin bir qolu) ilə daşınsa da, Gümrüdən keçən yol açıldıqdan sonra bu axınların bir hissəsi birbaşa Ermənistana gedə bilər.

Ekspert əmindir ki, Qazaxıstandan gələn yüklərin (təxminən 200 000 ton) logistikası da dəyişəcək:

“Məsələn, Qazaxıstandan Ermənistana göndərilən mallar, ehtimal ki, birbaşa Azərbaycan-Ermənistan marşrutlarına yönləndiriləcək. Dəyişikliklər Ermənistan yüklərinin (təxminən 300 000 ton) ixracına da təsir edəcək. Ermənistan faktiki olaraq onları Gürcüstan vasitəsilə deyil, qonşu Azərbaycan və Türkiyə vasitəsilə idxal edə biləcək”.