İnanıram ki, bu məsələ ilə bağlı konsepsiyalar və prosedurlar aydın şəkildə təsvir edilib, tənzimlənir və biz yalnız təsdiq edilmiş qaydalar çərçivəsində fəaliyyət göstərəcəyik.

Axar.az xəbər verir ki, bunu Ermənistanın Baş nazirinin müavini Mger Qriqoryan delimitasiya zamanı anklav və eksklavların taleyi barədə Baş nazir Nikol Paşinyanın bəyanatını şərh edərkən deyib.

“Cənab Baş nazirin mətbuat konfransını dinləmişəm. Düşünürəm ki, o, bütün suallara aydın cavab verib. Mənim əlavə edəcəyim heç nə yoxdur. Razılaşma yoxdur. Rəsmi müzakirə olunan və işçi qaydada müzakirəsi aparılan istənilən məsələni ictimaiyyətə açıqlayırıq. Dəqiqlik olan hər bir görüş və müzakirə açıq keçirilir və dərhal ictimaiyyətə açıqlanır. Bizim 13 görüşümüz olub və bütün görüşlərlə bağlı həm əvvəlcədən, həm də görüşlərin yekununda nəticələrə dair rəsmi məlumatlar dərc edilib. Bundan artıq heç nə deyə bilmərəm, çünki belə bir şey yoxdur. Sizin bildiyiniz formatdan kənar delimitasiya ilə bağlı heç bir iş aparılmır. Biz anklav və eksklav məsələsini müzakirə etsəydik və bu, işçi görüşü və ya müzakirə statusu daşısaydı, bütün suallara mümkün qədər ətraflı cavabların yer aldığı açıqlama dərc olunardı”, - o bildirib.

Qriqoryan əlavə edib ki, özü Ermənistan və Azərbaycan liderləri arasında söhbətdə iştirak etməyib və onların nəyi müzakirə etdiklərini bilmir:

“Baş nazir özü apardığı danışıqlar barədə danışıb”.

Qeyd edək ki, Paşinyan eksklavların qarşılıqlı mübadiləsini təklif edib.