Saakaşvili səbirlə öz partiyasını gücləndirmək və gənc nəsli öz tərəfinə çəkməklə, seçkilərdə təkbaşına olmasa da, koalisiya şəklində nəticə əldə edə bilərdi, ancaq o, bu yolu seçmədi.

Axar.az xəbər verir ki, bu sözləri Mixail Saakaşvilinin həbsinin Ukraynadakı siyasi proseslərə təsirini şərh edən politoloq Şahin Cəfərli deyib. Politoloq bildirib ki, “sərhəd əməliyyatı” ilə Ukraynaya qayıdan Saakaşvilinin sonrakı fəaliyyəti əslində siyasi intihar idi:

“Demokratik seçkilərin keçirildiyi bir ölkədə “impiçment” tələbi ilə küçə aksiyalarına başlamaq rasional deyildi. Üstəlik, Ukrayna Rusiya kimi “div”lə müharibə aparır və daxili sabitliyin Kiyev üçün həyati əhəmiyyəti var. Bu, istəmədən də olsa, Rusiyanın əlinə oynamaq demək idi. Məhz bu səbəbdən də ölkədəki vəziyyətdən narazı olmalarına baxmayaraq, ukraynalılar “Mixo Maydan”a dəstək vermədilər. Hətta digər müxalif qüvvələr də aksiyalara qoşulmadı. 2019-cu ildə Ukraynada prezident və parlament seçkiləri keçiriləcək. Saakaşvili səbirlə öz partiyasını gücləndirmək və gənc nəsli öz tərəfinə çəkməklə, seçkilərdə təkbaşına olmasa da, koalisiya şəklində nəticə əldə edə bilərdi, ancaq o, bu yolu seçmədi”.

Xatırladaq ki, Saakaşvili bu gün dövlət çevrilişinə cəhddə və cinayətkar dəstələrlə əlaqədə ittiham olunaraq həbs edilmişdi. Bu dəqiqələrdə isə o, hüquq-mühafizə orqanları tərəfindən saxlanıldığı maşından azad edilib.