Ana səhifə Gündəm |
"Mənim üçün bu, təəccüblü təyinatlardan biridir".
Bu sözləri Axar.az-a politoloq Qabil Hüseynli Mübariz Qurbanlının Dini İşlər üzrə Dövlət Komitəsinə sədr təyin edilməsindən bəhs edərkən söyləyib.
Politoloqun fikrincə, bu təyinat dövlətin yeni sərt dini siyasət yürüdə biləcəyinə işarədir:
"Əgər onun elmi ateizm üzrə fəaliyyəti olsaydı və ixtisaslaşaydı, dini sahə üzrə hansısa məsələ üzrə mütəxəssis olardı. O isə tarixçidir, amma partiya funksioneri kimi məşhurdur. Hər halda bu, Prezidentin işidir. Prezident indi belə məqsədəuyğun hesab edib. Görünür, bizim görmədiyimiz cəhətləri Prezident onda görür və inanır ki, bu sahədə yaranmış ağır vəziyyəti aradan qaldıracaq. Dövlət dini təriqətlər məsələsinə daha ciddi diqqət yetirməyə başlayıb. Əlbəttə, söhbət təkcə Mübariz Qurbanlıdan getmir. Burada ümumilikdə dövlət siyasəti önə çəkilir. Bildiyiniz kimi, dövlətin siyasəti ən üst səviyyələrdə hazırlanır. Məncə, dövlətin bu gün bu məsələyə mövqeyi ciddi surətdə dəyişib. Bu dəyişiklik özünü tezliklə bu şəxslərin fəaliyyətində tapacaq. Qısası, sərt dini siyasət yürüdülə bilər".
Qeyd edək ki, ötən gün Prezident İlham Əliyev Mübariz Qurbanlının Dövlət Dini Komitəsinə sədr təyin edilməsi haqqında sərəncam verib.
Tarix
2014.07.23 / 09:00
|
Müəllif
İlkin Həsənov
|