"Davudoğlunun Baş nazir seçilməsi Azərbaycanın xeyrinədir".

Axar.az xəbər verir ki, bu açıqlama ilə politoloq Elxan Şahinoğlu öz Feysbuk səhifəsində çıxış edib.

O, Davudoğlunun dövründə Türkiyə siyasətində dəyişikliyin olmayacağını deyib:

"Əhməd Davudoğlunun Baş nazirliyi dövründə Türkiyə-Azərbaycan münasibətlərində nə dəyişəcək? Mənə zəng edən jurnalistlərin əsas sualı budur. Aktual mövzudur. Sürpriz gözləmirəm. Doğrudur, bəziləri Davudoğlunu İsveçrədə Ermənistanla protokol imzalamaqda ittiham edir. Bəli, bu faktdır, ancaq ədalət naminə demək lazımdır ki, Ermənistanla məxfi təmaslara Davudoğludan əvvəl keçmiş Xarici İşlər naziri Əli Babacan başlamışdı. Bir də ki, Davudoğlu Ərdoğanın siyasətinə sadiq qalaraq, "Dağlıq Qarabağ ətrafındakı rayonlar boşaldılmadan Ermənistanla protokollar ratifikasiya edilməyəcək", - dedi. O biri yandan Davudoğlu Xarici İşlər naziri olduğu dövrdə Azərbaycanla sıx əməkdaşlıq edib və ikitərəfli münasibətlər üzrə mütəxəssis sayıla bilər. Odur ki, belə bir şəxsin qardaş ölkədə Baş nazir seçilməsi Azərbaycanın xeyrinədir".